പുരാതന ക്ഷേത്രത്തിലെ ബുദ്ധപ്രതിമയിൽ ചവിട്ടിക്കയറി മാങ്ങ പറിച്ച യുവതിയുടെ വീഡിയോ സൈബർ ലോകത്ത് പ്രചരിക്കുകയാണ്. തായ്ലൻഡിലെ ഒരു ബുദ്ധക്ഷേത്രത്തിലാണ് സംഭവം. പതിനാലാം നൂറ്റാണ്ടിൽ നിർമ്മിച്ച വിഗ്രഹമാണിതെന്ന് വീഡിയോയിൽ അവകാശപ്പെടുന്നു. സംഭവത്തിൽ നെറ്റിസൺസിനിടയിൽ പ്രതിഷേധം ശക്തമാകുകയാണ്. ബ്രിട്ടിഷ്, കനേഡിയൻ വിനോദസഞ്ചാരികളായ യുവതികളാണ് കറിവെക്കാനായി മാങ്ങ പറിച്ചതെന്നാണ് വീഡിയോയിൽ പറയുന്നത്. എന്നാൽ, ഈ സ്ത്രീകൾ ഇന്ത്യക്കാരാണെന്ന അഭിപ്രായവും ഉയരുന്നുണ്ട്.
സാൽവാർ കമ്മീസ് ധരിച്ച യുവതിയും മറ്റൊരു സ്ത്രീയും ക്ഷേത്രത്തിലെ മരത്തിൽ നിന്ന് മാങ്ങ പറിക്കുന്നതും, കൂടുതൽ മാങ്ങ കിട്ടാനായി വിഗ്രഹത്തിൽ കയറുന്നതുമാണ് വിഡിയോയിൽ കാണുന്നത്. ടിക് ടോക്കിലാണ് ആദ്യം വിഡിയോ പ്രത്യക്ഷപ്പെട്ടത്. ഇത് പിന്നീട് മറ്റ് സമൂഹമാധ്യമങ്ങളിലും പ്രചരിച്ചു. ഈ പ്രവർത്തിക്കെതിരെ ശക്തമായ നടപടി വേണമെന്ന് പലരും ആവശ്യപ്പെട്ടിട്ടുണ്ട്.
